【財經TOP SEARCH】中遠海控有貨或要喺呢個位「斬纜」

【Now財經台】截至早上11時止，1小時內《彭博》用戶搜尋量最多港股，依次為東方海外國際(00316)、中國銀行(03988)、萬科企業(02202)、龍湖集團(00960)及中遠海控(01919)。

航運股今日(8日)集體「沉船」，其中，中遠海能(01138)發盈警，預告上半年少賺11%，但冇提及原因，其實市場一直睇好集團盈利能力，但母企中遠海控第1季已少賺5%，依家連中遠海能盈利都倒退，成個航運板塊係咪真係咁差？

富昌證券聯席董事譚朗蔚表示，受惠於經濟復甦，行業喺過去3至4個月整體表現較強勢，除咗盈警外，亦要留意法國大選，因為6月11日航運股板塊下跌時，當日正正係法國總統馬克龍(Emmanuel Macron)宣布提前舉行大選，而今日法國大選結果出爐，航運股又跌，反映航運板塊會受政治因素影響。

Stevan又話，法國大選令中法合作、航道通行等問題上存在不穩定性，中遠海控股價今日已跌至重要關口，12元水平係不容有失，投資者需考慮喺呢個位止賺或止蝕。