【Now財經台】截至早上11時止，1小時內《彭博》搜尋量最多首5隻港股，依次為中國平安(02318)、聯想集團(00992)、貝殼(02423)、東方海外國際(00316)、中國石油化工(00386)。
再有藍籌發可換股債券(CB)籌錢，今次輪到平保計劃集資35億美元，呢批CB 2029年到期，換股價43.71元，較上日收市溢價21%，集資所得主要用於發展以金融為核心嘅業務。高盛分析指，平保發CB屬低成本融資，估計攤薄影響有限，但市場似乎唔太滿意發CB嘅消息，平保今日(16日)股價仍跑輸大市，早段一度急挫近6%，見33.95元嘅1個月低位。
大唐資本投資策略部總監盧志明認為，今次集資規模唔大，未必足夠支持業務發展，難免令市場質疑平保未必有需要向市場「伸手」。Ken續指，從基本面來看，今年初因中央連環出「組合拳」支持樓市而帶挈埋平保等一眾內險股，但最近嘅三中全會未見有政策利好，加上內地消費降級嘅現象令集團保單收益難有增長，唔排除今日資金借勢出貨而造成沽壓，料股價將受制於38元邊嘅技術阻力區，繼續徘徊喺32元至37.5元。
