【Now財經台】截至早上11時止，過去1小時內《彭博》用戶搜尋量最多港股，依次為比亞迪股份(01211)、美團(03690)、港交所(00388)、吉利汽車(00175)、地平線機器人(09660)。
車股今早(26日)急挫，其中，龍頭比亞迪一度急挫8%，連同吉利係今朝表現最差藍籌。集團最新喺微博宣布「百億補貼618」，包括「王朝網」及「海洋網」在內，合共22款車型減價10%至34%，會唔會引爆新一輪價格戰？車股值唔值得部署？
富昌證券聯席董事譚朗蔚指，依家唔係只關注已經減咗價嘅公司，係要思考其他2線及3線車企一旦打價格戰，到時呢啲中小型車企跟減，到底邊個較傷。
佢續指，內地汽車行業一直處於內捲狀態，面對好大競爭，不過，比亞迪及吉利每月、每季嘅交付量及毛利率，都比到投資者好大信心，事實上，呢兩隻都係好股，以比亞迪為例，上周因炒寧德時代(03750)影子、炒新嘅快充技術等，令市場超買，因此，佢認為相就算要打價格戰，最終都係比亞迪贏。
Stevan補充，比亞迪股價回調至420元水平就有吸引力，而吉利依家喺18.6元水平已有吸引力，短線借内捲及減價消息製造機會，但佢提醒，最好等股價企穩或有反彈跡象才做部署。
