【財經TOP SEARCH】內房股撈底吼呢兩隻

【Now財經台】截至早上11時止，1小時內《彭博》全球用戶關注度上升最多首5隻港股，依次為華潤置地(01109)、中國宏橋(01378)、建設銀行(00939)、安踏體育(02020)、中國移動(00941)。

潤地股價今早(18日)一度升6%，重上20天及50天線，其實唔單止佢，幾乎成個內房板塊都有得升，近日傳出內地首批房地產「白名單」項目已經審批完，獲批融資金額逾5200億人仔，同時又傳出內地加快推動萬億國債落地。雖然內房短線氣氛改善，但係咪都唔好亂撈？

椽盛資本投資總監曾永堅指，如果睇返3月主內房相關數據，內地樓市表現唔算令人滿意，不過，政策面就有正面消息，最新傳出計劃由中央出資建立1個房地產平台，收購全國爛尾樓再轉為保障性住屋，然後對外出售，如果政策真係落實，短期可以會為市場帶嚟沖喜效果，但要真正改善樓市基本面仍然需時。

個股方面，潤地及中國海外發展(00688)股價已累積一定跌幅，兩家公司不論背景及財務狀況，都應該有能力能應對內地樓市較長嘅調整周期，如果投資者想撈底，呢兩隻內房股係首選。