【Now財經台】近排內房不斷傳出嚟正面消息，最新有四川成都全面取消樓市限購令，今日(29日)內房股大爆發，個別民企內房升幅達60%，不過，摩根大通今日(29日)發嘅報告就有少少潑冷水之嫌，取消限購令可刺激內房銷售1至3個月，但未來有機會再度轉差，又認為唔足以扭轉樓價跌勢。摩通呢份報告中，有一半內房被睇淡，唯獨叫增持中國海外發展(00688)及華潤置地(01109)，想買內房股係咪應該揀呢兩隻？
中薇證券研究部執行董事黃偉豪指，有央企背景嘅內房的確比較穩陣，民企內房就炒味較濃，其實市場嘅睇法一直都係咁，但呢一刻其實應該再謹慎少少，即使中海外及潤地有央企背景，但沽空比率都超過30%，而銷售同其他內房一樣都要跌，加上市場擔心板塊炒高後，部分民企及小型內房會再趁高「抽水」，會令投資氣氛打折扣，所以Ravi建議等內房回返少少，再吼較重磅嘅內房股。
