【Now財經台】截至早上11點止，過去1小時內《彭博》用戶搜尋量最多港股，依次為中銀香港(02388)、銀河娛樂(00027)、建設銀行(00939)、中國人壽(02628)及長飛光纖光纜(06869)。
澳門上月博彩收入按年跌10%至216.8億澳門元，已連跌5個月，同疫情前2019年前比較，仍低18%，但按月回升約20%。不過，賭股今日(2日)有得升，連續兩個交易日反彈，係咪反映市場之前對賭收打定輸數？
富昌證券聯席董事譚朗蔚表示，雖然賭收按年數據唔理想，但金沙中國(01928)及銀娛都係跌浪反彈，主要受2個因素帶動，包括港股今日有少少反彈，不過，就算銀娛股價反彈，都唔可以扭轉過去年半嘅跌勢，依家只係基本跌浪反彈，除非股價上返34元或以上，先可以扭轉今年2月以來嘅跌勢，現時只係跌得比較慢。
業績方面，Stevan相信，市場都預咗唔會好，只要唔係特別差，銀娛股價可能會開始橫行，但估計去到34元水平都會止步。
