【Now財經台】截至早上11時止，過去1小時內《彭博》搜尋量最多港股，依次為新世界發展(00017)、快手(01024)、藥明生物(02269)、智譜(02513)、金斯瑞生物科技(01548)。
據《彭博》報道，快手旗下可靈AI(Kling AI)最快明年在港上市，集資最少10億美元，可靈AI係內地生成式影片AI重要一員，今年7月完成28億美元融資，獲阿里巴巴(09988)、騰訊控股(00700)、百度集團(09888)等投資，當時估值約150億美元。面對字節跳動(ByteDance)旗下Seedance、Google Veo及Runway等競爭對手，可靈AI排名亦經常位居前列，上市集資有助業務發展，但快手股價點解仍未受惠？
復星國際資產管理部投資經理李曉翀指，市場原本對可靈AI今年收入增長有較高預期，但第3季開始有消息指，市場對收入增長預期竟降至零，令投資者對年底表現信心大減，繼而拖累股價。以今次集資規模計，可靈AI估值約佔快手現時市值40%，其實已反映咗唔少憧憬。
佢又指，可靈AI或於短期上市嘅消息，對快手即市刺激作用唔大，而市場亦關注可靈AI面對嘅競爭，尤其字節跳動旗下Seedance不斷升級，若快手主營業務盈利受拖累，扣除可靈AI後其他業務估值可能會繼續收縮，要真正帶動股價，可能要等下一季業績對年底有更清晰嘅收入指引，先有機會重新提升市場信心。
