【Now財經台】截至早上11時止,過去1小時內《彭博》用戶搜尋量最多港股,依次為新世界發展(00017)、華虹宏力(01347)、MiniMax(00100)、貝殼(02423)、中芯國際(00981)。
貝殼今日(17日)出咗業績,第3季總交易額按年升逾4%至近7700億人仔,收入210億人仔,好過預期,刺激股價一度急升10%,高見50.25元,呢個增長勢頭可唔可以持續?
復星國際資產管理投資經理李曉翀指,貝殼股價暫時仍然係區間上落,但基本面其實唔差,內地政府加快收儲,有助盤活二手房市場,令貝殼唔再只係一個買賣房屋嘅平台。佢續指,喺「金九銀十」期間,雖然二手交投加快,但樓價暫時仍未止跌回升。
Andrew又話,若明年春季樓市表現進一步改善,貝殼有機會獲得更高估值,目標價可上望60元,不過,股價要先突破50元,企穩3日後,先有機會進一步上試60元。