【信報財經新聞】今早大市高開，見阿里巴巴(09988)開市三分鐘後倒跌，已經覺得唔對路，雖然恒指跟隨外圍高開0.68%，科指早段更一度升近1%，午後科網權重開始齊齊倒插，結果恒指收報25213點，跌0.4%，科指收4468點，跌1.1%，主板成交1993.82億元，這一幕科網股由強轉弱！
資金永遠最誠實
騰訊(00700)跌1.2%、阿里巴巴跌2.2%、小米(01810)跌2.2%、快手(01024)跌2.6%、網易(09999)跌2%，就連先前死撐大市嘅內銀股亦結束連漲全面回吐，農行(01288)、郵儲(01658)雙雙跌近3%，科網由強轉弱已經唔係第一日嘅技術性回吐，而內銀股就係剛開始，另外今日就係內房同生物科技身上由弱轉強，8月28日五部門齊出「現房銷售、信貸管理、資本市場融資」等新政，有券商點指出，實施近30年嘅預售制度退場，將推動行業由高槓桿、高周轉的資金驅動，轉向重品質、重運營嘅管理驅動，而市場資金實實在在認為新政策好不好，在8月31日新政後首個交易日，市場即用腳投票就可見一斑、建發國際(01908)單日瀉16.43%、中國金茂(00817)跌15.92%、越秀地產(00123)跌13.64%，華潤置地(01109)同中國海外發展(00688)亦跌近10%，然而今日形勢驟變，內房股突然回勇，越秀地產漲超5%，新城發展(01030)、華潤置地、中國金茂均漲超3%，生物科技更喺今日大亮點，中國生物製藥(01177)急升6.27%，和黃醫藥(00013)與GSK plc(葛蘭素史克)達成抗癌療法授權合作大漲逾14%，恒生生物科技指數逆市升1.86%。
捕捉低位入市時機
資金永遠最誠實，過去三日大市成交由2387億元、2166億元，一路縮到今日嘅1993.82億元，北水雖然淨買入近34億元，但外資收縮，反映資金只喺在唔同板塊之間遊走，並無新錢湧入，9月日本央行的議息會議、美國聯儲局動向仍有懸念，港股估值受美元波動牽制，恒指險守25200點，若果以為喺弱勢股反彈撐市，不如話係資金轉去低估值兼弱勢板塊先行避一避風頭，但其實真正考驗25000點的、並唔喺剛回勇嘅內房與生物科技股撐唔撐得住此關口，實質取決於科網股與內銀股呢班權重股幾時止跌，若現時與其追住內房股短線波幅，不如留意科網與內銀止跌嘅時刻，畢竟今年餘下時間，主軸仍係呢班剛由強轉弱嘅板塊，若捉得到強勢股何時願意再次抬頭，不排除就可坐到年尾待收成！
梁健雄
筆者未持有上述股票
電郵:deon_leung_888@yahoo.com.hk
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
