【信報財經新聞】港股市場上談到新能源汽車，大家第一時間諗起往往係比亞迪(01211)、吉利(00175)等第一梯隊車企，大家又知不知前身東風集團(00489)旗下孵化出高端新能源品牌嵐圖汽車(07489)，今年3月以介紹形式登陸港交所(00388)以來，喺一眾民營新勢力與合資品牌林立車企板塊中背景特殊，嵐圖背靠東風五十載造車底蘊，疊加與華為在智能化領域深度合作，今日交出上市以來首份中期業績報告，佢係現時港股中唯一純央企背景的高端新能源汽車股，這個招牌自然吸引筆者目光。
營收增、利潤虧
中期報告揭露咗「營收大增、由盈轉虧」的獨特情況，上半年收入逾181.59億元(人民幣·下同)，按年大幅增長逾42.36%，但歸母淨利潤卻由去年同期盈利轉為虧損近4億元，管理層解釋，碳酸鋰價格反彈、芯片及內存漲價，直接壓縮毛利空間，毛利率由去年同期兩成以上回落至17.7%，再加上內需不足、價格戰加劇等種種因素，出現「營收增、利潤虧」的業績倒退，值得一提係，2025年嵐圖首次實現年度盈利10.17億元，但當中計入政府相關補助達10.8億元，剔除補助後主營業務尚未真正實現盈利，當業績公報後，今日股價收報2.485港元，大跌11.3%，嵐圖今日嘅低價，係市場對佢「規模未達、盈利倒退」嘅懲罰，市場用腳投票態度相當清晰。
前期投入大增
拆開業績報告，有兩點值得投資者留意，首先上半年研發開支9.1億元，同比大增70%，銷售管理開支34.5億元，同比增加44%，主因門店數量持續擴張、新車上市及品牌建設投放，這些均屬前期投資。第二點上半年營收大增至181.59億元，汽車交付量穩步上升，6月交付突破1.4萬輛，7、8月份亦持續企穩1萬輛以上，連續多月保持強勁勢頭，嵐圖銷量確有明顯增長，但放落行業之間比較，吉利、比亞迪規模遠遠大於嵐圖，兩者早已邁入月銷十萬輛甚至幾十萬輛之行列，嵐圖僅萬輛級交付規模，處規模效應攤薄成本嘅遊戲規則中，仍然處於弱勢，呢個差距亦可能係佢盈利倒退嘅根源之一。
嵐圖值得觀察
展望全年，嵐圖20萬輛銷售目標恐怕不易達成，上半年累計交付7.6萬多輛，要達標即下半年每月要維持2萬輛以上交付，挑戰不可謂不大，不過市場往往喺最悲觀之時忽略咗估值嘅安全邊際，與鴻蒙智行及一眾新勢力車企相比，嵐圖估值明顯偏低，而且車企中同樣未有盈利貢獻亦受資金追捧，嵐圖既有央企信用背書，又與華為深度合作，銷量連續提升，又願意作出前期投入，低估值並唔係買入的充分理由，但絕對係可以留意，不妨將佢放入你的觀察名單中，再待連續幾個月交付數據，見到毛利率企穩回升，證明嵐圖真係配得起「央企高端新能源汽車第一股」嘅稱號，到時才再行決定。
梁健雄
筆者未持有上述股票
電郵:deon_leung_888@yahoo.com.hk
編按:作者梁健雄，香港財務策劃人員總工會司庫一職，從事金融業逾20年，曾任職多份報章包括英文虎報、南華早報、華爾街日報等後勤部工作。《炒股讀心》逢每周四跟讀者分享投資心理！
