【Now財經台】截至早上11時止，1小時內《彭博》搜尋量最多港股，依次為蒙牛乳業(02319)、翰森製藥(03692)、藥明合聯(02268)、智譜(02513)及敏實集團(00425)。
蒙牛中期純利按年增長逾15%，收入按年增長7.8%，由於原材料成本上升，拖累毛利率跌至40.8%，經營利潤率亦跌至8.2%。蒙牛股價今早(27日)一度挫逾6%，其後有買盤吸納，半日收市跌近2%。蒙牛上調全年收入增長預測，又話對提升毛利率及經營利潤率有信心，預期下半年利潤將會更好，呢啲「定心丸」可唔可以畀到市場信心？
香港股票分析師協會副主席曾永堅指，蒙牛係針對毛利率及經營利潤率表現畀指引市場，睇返上半年業績，其實整體收益好過市場預期，淨利潤差過預期只係受原材料漲價影響，但原材料漲價趨勢一定令市場擔心，所以股價都需時消化，下半年原材料價格壓力係咪可以紓緩。
Jasper又指，蒙牛估值對應市盈率(PE)都算合理，所以股價喺18元水平有一定支持，雖然今日因為業績而受壓，但睇返技術走勢，50天線，即17.8元水平有明顯支持，所以估值對股價會有穩定作用。
