【Now財經台】截至早上11時止，過去1小時內《彭博》搜尋量最多港股，依次為濰柴動力(02338)、國泰航空(00293)、敏實集團(00425)、泡泡瑪特(09992)及友邦保險(01299)。
泡泡瑪特股價今日(10日)一度升逾5%，高見177.4元，管理層表示，期望第4季喺美國開旗艦店，又指去年非Labubu產品佔美國總收入逾50%，亦佔日本、南韓、東南亞銷售大多數，例如「星星人」系列已成為亞洲增長最快嘅IP之一，期望消費者唔好只聚焦Labubu，到底海外增長可唔可以彌補到整體增長放緩？
資深證券分析師彭偉新指，最新非Labubu銷售數據，相信可以令市場冇咁擔心，加上市場喜好有變，可以令增長放緩嘅負面影響逐步消退。
不過，Castor指出，泡泡瑪特內地銷售佔比之大仍然係不容忽視，雖然其他國家嘅銷售有增長，但佔比始終唔大，不過，都會對股價有一定推升作用，因為投資者主要睇消息面，見到集團海外銷售理想，有機會吼位買貨。
股價方面，佢坦言，未來會唔會顯著上升仍比較難估計，因為唔係每個IP都可以帶嚟相同效果，仍要等數據出咗嚟，先可以判斷股價未來走向。
