【Now財經台】美股上周大幅波動後，出現報復式反彈，其中，道指上周五(6日)更歷史性衝破50000關，市場有換馬跡象，部分資金由科技股轉投價值股，港股嘅傳統股可唔可以複製外圍升勢？公用股、銀行股可以點部署？
獨立市場策略師何啟聰指，港股升嘅邏輯同美股有少少唔同，主要睇經濟有冇回穩，公用股以港鐵公司(00066)為例，市場或預期樓市回穩可以令集團賣地收益增加，所以今年嘅升幅都較大，但Ivan提醒，唔少公用股已升至52周高位，息率已經唔算特別吸引，除非睇好樓市繼續反彈而吼相關股份，否則，依家再追中電控股(00002)、港燈(02638)呢類股份，水位已經唔多。
Ivan又話，銀行股轉強，主要受惠於恒生銀行私有化後釋放咗過千億元，呢批資金嘅股東大部分係「食息一族」，攞返現金後首選仍會係派息穩健嘅本地銀行股，例如中銀香港(02388)，相比之下，國際銀行如渣打集團(02888)等股息率唔係咁高，亦受亞股影響較大，未必可以直接受惠呢波資金流。
Ivan建議，兩者除咗派息，亦要考慮增長空間，依家公用股上行空間有限，銀行股即使美息唔落，仍可受惠於息差較闊嘅優勢。
