【Now財經台】本港新股市場持續熾熱最近有十隻IPO，其中，內地「AI六小虎」之一嘅稀宇科技(MINIMAX)招股價介乎151元至165元，每手20股，入場費3333元，集資近42億元，公開招股將會喺下周一(5日)截飛。截至2025年9月止9個月，MINIMAX收入約5300萬美元，按年大增1.7倍，呢家公司有咩賣點？
高歌證券金融首席分析師聶振邦指，MINIMAX嘅業務類似DeepSeek，JASeek，都係主打人工智能(AI)大模型，包括語音、影片內容生成，將文本輸入轉換為多語言，會有迫真嘅人聲，甚至識得作曲等，可應用喺唔同AI場景，所以唔少企業如金山軟件(03888)，都引入佢嘅服務。
聶Sir續指，MINIMAX主要收入來源係接入唔同企業，然後收取API Token，目前嚟睇，MINIMAX用戶基礎大，有近2億用戶，收入亦唔錯，只要增長勢頭持續，集團有望扭虧為盈。
