【Now財經台】截至早上11點，過去1小時內《彭博》用戶搜尋量最多港股，國泰航空(00293)、比亞迪電子(00285)、騰訊控股(00700)、比亞迪股份(01211)及泡泡瑪特(09992)。
國泰航空今日(6日)公布業績，股價半日曾跌1%，低見11.88元。業績前據報公司將會買新飛機，係咪反映公司需要更多飛機以應對需求增長？但美國關稅不確定性似乎仍影響緊國泰貨運需求？
資深證券分析師彭偉新指，國泰以往曾同其他公司聯營航班，以應對利潤較低或需求較低嘅航班，但近期歐洲客運及貨運需求增加，加上整體客運需求恢復加快，都反映公司需要新飛機，所以依家係買新飛機嘅合適時機，亦反映公司業績或會有睇頭，所以先會有足夠資金買新飛機。
貨運方面，Castor指，航空貨運通常以急件及高價值貨品為主，呢啲產品對價格敏感度低，所以加關稅未必會令貨運需求大跌。雖然近日有數據顯示貨運需求麻麻，但佢認為，貨品只不過喺一啲重要日子，如對等關稅(Reciprocal Tariffs)「解放日」(Liberation Day)前提早運出，估計將來關稅影響明朗化後，對航空貨運需求反而係好事，並對未來貨運增長動力充滿信心。
