【Now財經台】比亞迪電子(00285)股價今年弱勢，至今累跌40%，今日(7日)又穿底，低見20.1元，更畀高盛降評級至「沽售」，目標價「腰斬」至21元，雖然比電係人工智能(AI)伺服器產業鏈其中一員，包括液冷及電源系統，高盛更直指比電毛利率2026至28年介乎8%至9%嘅目標難實現，有數據顯示，去年液冷市場規模增長近45%，到底比電有冇優勢，前景又如何？
天風國際李偉傑指，比電其實有一定優勢，因為始終背靠母企比亞迪股份(01211)，去年比電AI算力基礎建設增長31%，追貼整體行業增長嘅40%，若未來AI算力需求持續提速，比電可以背靠比亞迪攞到更多合約，同埋跟更多企業合作，所以比電嘅AI算力或製冷業務值得憧憬。
Jason又指，比電嘅AI算力基礎建設業務收入佔比，相對於整體收入佔比唔大，估計要等佔比升至雙位數，影響力先會慢慢浮現。不過，今年下半年開始AI算力膨脹速度太快，唔少相關公司收入佔比下滑，相信呢個情況會持續，所以暫時難以提升佔比。
