【Now財經台】淨息差係銀行一個重要經營指標，香港跟美息，內地就跟返本身嘅政策利率，睇返兩者走勢，都見到息率收窄嘅情況，會點影響銀行股前景？銀行股仲有冇吸引力？
獨立市場策略師何啟聰指，內地及本港息率都收窄緊，內銀股基本上每家都跌十幾點子，銀行除咗淨息差外，仲有非利息收入，若銀行業務較多元化，非利息收入就會好啲，內銀股之中，以中國銀行(03988)做得比較好，本港方面，滙豐銀行及中銀香港(02388)嘅業務，較大新銀行集團(02356)及恒生銀行(00011)更多元化，當淨息差下行時，呢啲銀行可以靠非利息收入抵銷淨息差收窄嘅影響。
Ivan又話，依家本港銀行息率介乎5厘至6厘，唔算吸引，但投資者要承擔撥備風險，依家中美貿易戰仍然唔明朗，佢估計，今年撥備會有上升趨勢，佢建議，投資者可以留意內地電訊股，因息率同內銀股差唔多，但具穩定性及有國策傾斜，想分散風險嘅投資者，亦可以考慮高息股交易所買賣基金(ETF)。
