【Now財經台】截至早上11時止，1小時內《彭博》用戶關注度上升最多首5隻港股，依次為吉利汽車(00175)、騰訊控股(00700)、中國海外發展(00688)、建設銀行(00939)、金沙中國(01928)。
吉利旗下電動車品牌「極氪」1月整體交付量按年大升3倍，創新高，按月微跌7%，但跌幅細過其他電動車企。吉利股價今早(2日)一度升逾9%，高見8.05元。
不過，大華繼顯執行董事梁偉源認為，極氪上月交付1.2萬輛唔算多，並指數據符合預期，亦見到普遍按年升、按月大跌嘅現象。Steven續指，車廠賣車畀經銷代理後，有可能因為賣唔晒而累積唔少庫存，佢認為，要睇埋吉利等車企稍後公布嘅實際銷量數據，先可以評估到內地電動車市場係咪咁樂觀。
