【Now財經台】截至早上11時止，1小時內《彭博》用戶關注度上升最多港股，依次為小米集團(01810)、中國海洋石油(00883)、快手(01024)、融創中國(01918)及金沙中國(01928)。另外，第6至10位依次為新奧能源(02688)、吉利汽車(00175)、碧桂園(02007)、萬科企業(02202)及安踏體育(02020)。
小米董事長雷軍昨日(28日)豪言，未來15至20年時間成為全球排名前5嘅車廠，新車電機最高轉速勁過Tesla，雖然未有價錢同明確上市日期，但已經有大行唱好。瑞銀就指，小米新電動車質量比預期好，預料最平都要70萬人仔。不過，小米股價似乎見頂回落，中午收市前跌逾5%，向下逼近15.195元，即50天線。純粹係收爐前獲利，定係瑞銀對價錢嘅預測嚇窒市場，擔心定價太高不利銷售？
大華繼顯執行董事梁偉源認為，今年下半年唔同電動車品牌都開始減價，包括帶頭嘅Tesla同比亞迪股份(01211)，市場都會疑慮明年電動車市場係咪仲有咁大增長空間？另外，如果大家都有呢個減價力度，對生產商嘅利潤都有壓力。
佢又話，小米汽車目前定位高檔市場，但經濟唔好財富效應比較差，貴價電動車需求成疑，如果價錢確實如瑞銀預期，投資者可能考慮外國品牌。始終大家普遍認為小米品牌屬較低檔產品，用呢個品牌打高檔次電動車市場唔太適合，除非好似吉利咁成立另一個新品牌。
