【Now財經台】阿里影業(01060)去年由盈轉虧，自4月6日發盈警以來，股價最多回調逾20%，過去半年，阿里影業股價基本上一直守住0.4元水平，負面因素係咪已反映晒喺股價上？
寶鉅證券董事及首席投資總監黃敏碩指，負面因素之前已反映咗，阿里影業作為新經濟股，主要係睇經調整後嘅表現，雖然業績冇預期咁差，全年經調整EBITDA按年大升1倍至2.95億人仔，加上市場認為集團業務變數較小，但呢隻股份又未必算好吸引，吸引程度要視乎內地整體票房對股價嘅影響，建議現階段想買貨嘅投資者以小注為主，或以半冷門嘅態度去睇呢隻股份。
