【Now財經台】臨近農曆新年，意味內地春節電影檔期已殺到，雖然暫時未見有特別措施谷票房，但睇嚟都幾熱鬧，今個春節檔期共有7套電影上映，包括阿里影業(01060)有份嘅《封神第二部》，暫時已打入貓眼平台最受歡迎電影排行榜第3位，2025年嘅春節票房有冇機會大翻身，扭轉2024年暑假、國慶檔期嘅頹勢？對阿里影業股價又有冇幫助？
博威環球證券金融首席分析師聶振邦指，睇返阿里影業有份嘅《封神第二部》，如果睇返《封神第一部》嘅反應，估計《封神第二部》會有一定熱度，加上粉絲十分期待，好大機會可以喺7套電影中跑出。
股價方面，聶Sir就話，阿里影業股價依家喺0.5元水平，係一個比較關鍵嘅位置，若股價今日(13日)收市及明日(14日)都可以企穩呢個位，短線可以睇0.55元至0.59元水平，如果要進一步破頂，就要大市氣氛都有改善，先可以再推升股價。
