【Now財經台】阿里影業(01060)中期轉賺逾4.6億人仔，早前收購有大量演唱會票務代理生意嘅「大麥」係業績一大亮點，雖然仍未入帳喺阿里影業業績，但期內收入逾7億人仔，有潛力成為第2大收入貢獻，商品交易總額(GMV)亦按年大增5倍。不過，值得留意係，如果計及「大麥」成本，整體成本就增至逾17億人仔，涉及嘅開支都超過2億人仔，對下半財年嘅利好作用有幾大？
英皇資本財富管理方案研究總監陳錦興認為係利大於弊，「大麥」主要做現場演出、音樂會，呢啲活動喺疫後復甦情況好理想，假設「大麥」條數入埋阿里影業今次呢份業績，會見到收入及盈利都明顯增長，至2025年度就可以完全反映對業績收入嘅貢獻。佢又相信，市場未來對「大麥」同阿里影業嘅協同作用都會有正面睇法，亦會有一定憧憬。
