【Now財經台】內地春節長假期放到下周一(19日)，雖然今年嘅春節電影檔期頭4日(10日至13日)嘅入場人次按年增長2%至9000萬，但受累於消費降級，平均票價跌6%，連帶累計總票房收入亦跌4%，錄得近45億元人仔。
目前領跑春節檔票房嘅係勵志喜劇《熱辣滾燙》，由阿里影業(01060)擔任出品人及發行人，暫居第2嘅《飛馳人生2》嘅出品人則有貓眼娛樂(01896)同阿里，票房造好帶動兩隻股份升逾2%。博威環球證券金融首席分析師聶振邦分析指，目前2部電影佔總票房約65%，阿里影業會較貓眼更受惠，股價有望喺春節檔期跑出。
不過，聶Sir提醒，阿里影業市盈率(PE)處於逾62倍嘅高水平，又指毫子股嘅股價會較波動，預期升到0.48元會遇較大阻力，距離現價0.435元水位唔多，只適宜小注部署。
