【Now財經台】高鑫零售(06808)股價已經連升第3日，尋日逆市升6%後，今朝雖然受大市影響一度倒跌，但臨中午收市前已經倒升，午後愈升愈有，高見3.5元嘅近14個月高位，最終收市報3.49元，升6%。
阿里巴巴(09988)係控股股東嘅高鑫零售從事內地大賣場業務，提供各種零售商品。公司近日無特別消息，相信係瑞銀最新的研究報告為股價帶來相當大嘅正面作用。
瑞銀一方面將高鑫零售的評級由原來的「中性」調高至「買入」，更重要的是將目標價調高至5元，成為全城最牛嘅大行。
瑞銀認為，高鑫實體客流增長已經由谷底反彈，預期2024財年同店銷售回復正增長，係消費者行為改變的潛在受惠者，最新調高公司未來3個財年每股盈利預測23%至47%。
技術走勢方面，雖然股價自去年11月起至今累計反彈逾1.4倍，但瑞銀認為現價較2019年均值仍低58%，現估值低於同業。股價今日升至14個月高位，上望下一站係去年2月3.675元嘅位置，但目前14天相對強弱指數(RSI)已升至接近70嘅超買水平，短期不排除會出現整固。
