【Now財經台】屬於阿里系、已經派咗成績表的高鑫零售(06808)今日跌得相當誇張，收市大跌22%報2.59元，今日成交股數急增。
高鑫成績表其實唔算太差，但投資者明顯對公司前景同復甦無信心，高鑫去年線下業務幾差，客流量下跌，唔計家電嘅同店銷售下跌4%，雖然疫情過後今年應該有復甦，但高鑫做的是傳統大賣場，市場覺得新零售模式興起下難有好轉，高鑫都有提到線上渠道，尤其係拍住母企阿里巴巴(09988)嘅社區團購供給業務有進展，去年收入有雙位數增長，但就無透露盈利表現、盈利貢獻係點。
業務模式，以至消費大環境都明顯地對高鑫有大影響，管理層都預告過，今個財年純利只會持平，所以股價、估值調整都唔出奇。
