【Now財經台】截至早上10時45分止，1小時內《彭博》搜尋量最多港股，依次為高鑫零售(06808)、聯想集團(00992)、紫金礦業(02899)、中國宏橋(01378)及永利澳門(00864)。
高鑫接獲大股東阿里巴巴(09988)通知，現時有潛在收購要約，公司亦發咗盈喜，股價今早(16日)一度勁升逾30%，雖然阿里話有潛在收購，但作價、要約人身分都冇披露，點解市場睇得咁正面？對高鑫又有咩影響？
資深證券分析師彭偉新指，潛在收購會對高鑫有正面影響，企業一般都會以平均價加溢價做收購，高鑫股價今早爆升，好大機會係呢單潛在收購有溢價，預期小股東、非關連人士都願意投贊成票，即使之後股價升幅收窄，對收購結果都唔會有太大影響，因為主動權仍然喺阿里手上。
佢又話，高鑫依家發展路向逐漸清晰，即使被收購後實際價值唔大，收購作價又低過入股價低，但仍會出售股權。
