【財經TOP SEARCH】小米要先整固才有力再上

【Now財經台】截至早上11時止，1小時內《彭博》用戶搜尋量最多港股，依次為小米集團(01810)、銀河娛樂(00027)、聯想集團(00992)、中國平安(02318)及金沙中國(01928)。

小米股價今日(25日)一度升3%，高見21.85元，衝上逾兩年半高位，但之後掉頭向下，一度倒跌2.5%，低見20.65元，成交相當活躍，原因係有唔少大手成交，半日成交金額逾39億元。小米股價今朝出現單日轉向，係咪反映所有利好消息已反映晒？股價短線係咪已見頂？

亨達財富管理董事總經理姚浩然表示，小米股價今朝先高後低，係一個不利訊號，小米有別於其他大型科技股，阿里巴巴(09988)及騰訊控股(00700)等已上返近期高位，但小米早已升上高位，再向上突破，累積升幅比其他同類股份大，導致小米出現獲利回套情況，資金就順勢流向資源及保險等板塊，但純粹換馬行動，同基本因素冇太大關係，佢估計，小米股價要喺20元水平完成整固後，才有力再上。