【輪證贏家】恒指牛試追轉燈

【now.com財經】噚日無睇指數，執咗隻比亞迪(01211)出嚟，皆因摷返業務睇佢都算係有條件避得開關稅呢單嘢：喺美國嘅乘用車銷售為零；而商用車業務則通過美國當地生產，所以緩解咗關稅壓力。

於是，揀咗隻比迪牛(69666)出嚟，平時用返五分鐘圖借Slow STC(14.3)或保歷加頂底線玩Swing一趟就算啦。

出文時係中午休半場時間，見五分鐘Slow STC(14.3)當時兩線上到超買位，可以慢慢食完個飯先至睬佢。

下半場開市後見股價向下落返去，啱呀，我就係要等見五分鐘Slow STC(14.3)落返超賣之嘛。終於等到大約2點25分，五分鐘Slow STC(14.3)兩線終於都落到超賣位，比多五分 鐘時間更見Slow STC(14.3)出觸底，(69666)有條件出場。

如同平時一樣用10分鐘時間作為買貨時間的話，期內(69666)高低位做過0.056元/0.049元，平均買入價為0.0525元。

落場後只需要等返五分鐘Slow STC(14.3)上返超買就可以啦。等等下忽然手機響起一個msg話比亞迪出咗盈喜，再不知那裡來嘅東風吹起港股，股價跟住一齊上，去到3點打後已經見返五分鐘Slow STC(14.3)兩線上到超買範圍。

及至3點40分，見五分鐘Slow STC(14.3)兩線出觸頂向下兼離開超賣範圍，唔過夜(69666)亦都可以收工。

同樣地用10分鐘時間走貨的話，(69666)期內高低位做過0.064元/0.059元計，平均走貨價為0.0615元。呢一趟平均執9格或17.14%。

正如噚日所講，中美雙方立場堅定同時仲要將個關稅繼續推上去，噚日都只係係咁易開一開個人道走廊出嚟架咋。

隨住關稅戰升級，美股隔晚見紅後輪到今朝港股跌多六舊，直接將重貨牛送走，低開後我都要向前搵返年初啲上升裂口借一借位，最後搵到由1月低位18,671點起步上之後嘅第一個裂口，即1月16日嗰一個。畫好圖掟咗出作戰室後，先追淡再見補咗呢個裂口之後，再做反手好倉，開市16分鐘戰友已經爬完格仔；再到依家10點7分，都不知食咗幾多轉。

小時圖上見今日指數擺位都仲係低於10線以下位置，不過Slow STC(14.3)兩線亦有見觸底上，而依家10點10分恒指跌幅亦已經大幅收窄至跌377點，報19,750點。

的確作戰室已經追咗好倉一個朝早，五分鐘圖上見指數喺中軸前，未過線，同時Slow STC(14.3)兩線亦觸底上咗一半。過到中軸嘅話恒指牛(67719)，收回價19,000點，同現價都有約500幾點，槓桿28.3倍。過五分鐘圖中軸出好倉唯一小心嘅係同中軸線比較近嘅仲有一堆平均線喺上面，小心線。

期貨已經著返綠燈啦！現貨未嘅，加油！

作者阿珊，以技術分析專心玩輪證，唔貪心，努力賺取我家肥貓罐罐。

想減低Day Trade失敗率?!試吓搵作戰教室幫你，7日免費試用：https://www.patreon.com/join/cbbcwar

資訊只適用於合資格的香港投資者。結構性產品由瑞銀發行，瑞銀證券為流通量提供者，可能是唯一報價者或巿場參與者。結構性產品價格可急升或急跌，投資者可能會蒙受全盤損失。過往表現並不反映將來表現。投資前應瞭解有關風險，並諮詢專業顧問及查閱有關上市文件。