【財經TOP SEARCH】私有價冇肉食！歐舒丹趁復牌食糊走人

【Now財經台】截至早上11時止，1小時內《彭博》搜尋量最多首5隻港股，依次為歐舒丹(00973)、中國銀行(03988)、華晨中國(01114)、天泓文創(08500)、港交所(00388)。

歐舒丹今早(17日)開市前停牌，指涉及收購合併消息，股價停牌前報32.35元，雖然併購細節未明，但市場估計，同4月底公司主席以每股34元提出私有化嘅事件有關，當時主席表明唔會提高私有化作價，歐舒丹午後復牌，股價一度高見33.5元，升逾2%，其後於33元水平上落，對比私有化作價每股34元，現時溢價唔夠5%。

富昌證券聯席董事譚朗蔚估計，喺貨源歸邊下，私有化動議好大機會獲得通過，不過，佢分析指，歐舒丹股價今年以來升幅顯著，唔排除因為有春江鴨早於數月前開始炒作消息，並提醒一旦私有化失敗，股價好可能會大幅回套。

Stevan續指，即使私有化成事，作價同股份現價水位唔多，建議有貨嘅投資者趁復牌盡快食糊走人。