【Now財經台】長飛光纖光纜(06869)、建滔積層板(01888)、英諾賽科(02577)及天岳先進(02531)都係今日(10日)50大活躍成分股之一，雖然大部分股價都跌得多，但個別仍喺相對高位，港股已連跌6個交易日，喺市況欠佳下，邊啲屬於高危股？
元宇證券投資總監林嘉麒認為，如果企業需投資數據中心，涉及嘅成本一定較高，投資者或會擔心公司要向國家，甚至股東「伸手」，因此，一啲股價升至高位嘅AIDC(人工智能數據中心)股會跌先，相反，若企業屬於供應鏈上游，例如長飛光纖及建滔積層板，由於投放量唔多，以產出為主，短期抗跌力會明顯較強。
此外，KK又提及濰柴動力(02338)，公司首季盈利差過預期，加上新能源收入佔整體比例仍偏低，加上市場依家處於避險狀態，因此，預期盈利短期難大幅增長，建議投資者吼股價回落至介乎32至33元再入手。
