【Now財經台】美圖公司(01357)股價今日(6日)一度飆逾18%，高見4.95元，可能同公司罕有喺開市前公布首季業務狀況有關，截至3月底止，付費訂閲用戶按年增長30.2%，「生產力應用」首季收入亦增約45%，係咪證明美圖唔使驚被人工智能(AI)取代？
Blue Water Capital投資總監李澤銘指，美圖暫時未有被淘汰跡象，股價之前一路向下，其中1個主因係市場擔心「豆包」等AI應用會取代美圖部分功能，但今日呢份成績表為市場帶嚟驚喜，見到美圖忠實用戶及增長持續，相信可以釋除市場短期憂慮，更成為股價催化劑，但中長線而言，隨著用家對AI大模型應用嘅依賴增加，美圖嘅用戶未來仍有機會被搶走。
Alan又話，美圖喺B端及C端嘅增速其實差唔多，B端用戶多數係小商戶，黏性較C端高，不過，AI發展令開發設計軟件嘅研發成本細咗，競爭門檻未必好似想像中咁高，市場仍需觀察多幾期數據，先可以確認美圖喺B端設計軟件市場係咪真係可以企穩陣腳。
