【Now財經台】截至早上11時止，過去1小時內《彭博》用戶搜尋量最多港股，依次為騰訊控股(00700)、天數智芯(09903)、建設銀行(00939)、智譜(02513)及美圖公司(01357)。
圖形處理器(GPU)概念股天數智芯股價今日(15日)一度逆市炒高逾13%，高見120.8元，股份今日除淨，1股送2股，即原本持有100股變成300股，一手由之前逾3萬元變成逾萬元，入場費平咗、拆細咗，係咪股價今日炒起嘅主因？
復星國際資產管理投資經理李曉翀表示，短期的確同入場費平咗、拆細咗有關，但中長線嚟講，當美國或以保持人工智能(AI)領先地位為理由，暫停出口優質GPU，就會加快天數智芯喺內地晶片國產替代進程，加上集團積極跟字節跳動(ByteDance)磋商晶片大規模供貨，中信里昂給予集團明年市銷率(PS)20倍，意味預估收入增長要達50%至100%。
佢又話，未來要留意其他大型科企，會唔會用天數智芯嘅晶片研發AI模型，如果出現呢個情況，天數智芯晶片會受惠於內地GPU加價潮。
