【Now財經台】濰柴動力(02338)昨日(29日)出咗第1季業績，收入按年增長8.9%至625億人仔，純利就按年增長逾13%至逾30億人仔，雖然增長唔算好誇張，但增速較去年底有所加快，濰柴股價今日(30日)一度大升10%，高見39.78元，今年以嚟更累升逾1倍，係咪反映公司前景愈來愈好？當中有咩推動力？
耀才證券研究部總監植耀輝指，今年唔少公司嘅季績都唔算特別標青，但濰柴核心利潤增長差唔多20%，對好多公司嚟講，有10%至20%增長係好唔容易，所以呢份成績表已經唔錯。佢又指，集團第1季表現好，加上緊貼近年人工智能資料中心(AIDC)主題，喺呢個情況下，股價有咁好表現係預期之內。
Stanley又指，濰柴數據中心備用電源由柴油發電機，擴大至採用埋天然氣發電機會較環保，加上海外市場需求都比較大，所以毛利率有較好表現。
