【Now財經台】截至早上11時止，過去1小時內《彭博》搜尋量最多港股，依次為騰訊控股(00700)、美團(03690)、濰柴動力(02338)、李寧(02331)及比亞迪股份(01211)。
騰訊擬推出微信人工智能(AI)助手，市傳最快月內發布，股價今朝(2日)一度炒高逾8%，過往市場普遍認為騰訊AI布局相對少，今次消息對騰訊有咩幫助？
信達國際研究部助理經理陳樂怡指，騰訊喺近期季績中已表明，要喺AI方面發力及加大投資，今次以微信作切入點，相信佢嘅生態系統都可以釋放價值，對用戶而言，微信喺日常各個層面都會廣泛使用，唔使花時間重新建立習慣，隨著用戶滲透率提升，騰訊喺AI估值方面有上行空間。
Tracy又話，股價表現就要視乎投資者口味，今年以嚟，AI主題入面龍頭股被擺埋一邊，但近期強勢概念股回套，加上美團公布業績契機，資金開始返番嚟，估值現時相對低殘，未來催化劑要睇埋投資回報率(ROI)，當市場風險偏好較高時，普遍會支持龍頭企業加大投資。
