【Now財經台】截至早上11時止，過去1小時內《彭博》用戶搜尋量最多港股，依次為騰訊控股(00700)、新世界發展(00017)、濰柴動力(02338)、中國移動(00941)及智譜(02513)。
科網股季績中，市場關注人工智能(AI)業務表現多過整體盈收，百度集團(09888)係其中之一，上季核心AI收入按年增長49%，而佔整體收入比例更首度超過一半，升至52%。騰訊之前公布嘅季績，核心業務韌力及AI策略推進都獲大行認同，但股價趨勢表現，百度就明顯好過騰訊，騰訊嘅AI成績符唔符合市場期望？
信達國際研究部助理經理陳樂怡指，騰訊業績反映核心業務、長青遊戲仍有韌力，流水方面亦交到功課，而AI方面就一如預期要加大投資，集團部分大模型開始商業化，預期對業務、生態系統都有幫助。
不過，佢認為，騰訊作為龍頭就冇咁著數，就算有穩定現金流，投資者反而想買返啲AI基建相關股，而故事憧憬空間亦較大，例如大模型或企業轉型。
百度方面，Tracy就話，嚟緊嘅重大催化劑係分拆崑崙芯上市，可以留意估值可以畀到幾高。佢又話，騰訊就勝在穩打穩扎，但AI方面對比阿里巴巴(09988)、百度就未可以令市場太亢奮。
