【Now財經台】內地車企銷售一哥上季執位，吉利汽車(00175)以70.9萬架嘅總銷量，力壓比亞迪股份(01211)嘅70萬架，相隔3年，重奪內地自主汽車品牌銷售一哥寶座，對行業或車企係咪意義重大？
勝利證券首席顧問陳建良指，吉利銷售表現的確強勁，但投資者唔會單睇銷量，又或係咪重奪龍頭地位而作出投資決定，因為兩家車企嘅策略完全不同。佢續指，吉利唔少汽車零部件靠組裝，唔係完全自主生產，反觀比亞迪除咗玻璃及車胎外，幾乎所有零部件都已經實現自主生產，令集團喺控制成本方面有絕對優勢，如果純粹打「內捲」價格戰，比亞迪應該會贏。
但KL認為，依家市場焦點已轉向海外銷售，令吉利同比亞迪勢均力敵，睇返數據，吉利上季出口增速及比例大升，就解釋咗點解股價近期大幅跑贏其他電動車股。
不過，陳建良建議投資者不妨保守啲，喺現時市寬唔高之下，去高追一隻股份會有風險，亦反映市場資金非常集中，吉利股價現時呈上上落落、波幅收窄嘅態勢，仍未到重拾升浪嘅時機，所以投資者宜審慎部署。
