【Now財經台】截至早上11時止，過去1小時內《彭博》用戶搜尋量最多港股，依次為長飛光纖光纜(06869)、中芯國際(00981)、吉利汽車(00175)、哈爾濱電氣(01133)及美團(03690)。
長飛光纖股價之前已4連升，累升30%，今朝(10日)一度再破頂，高見245.8元，升2.2%，但其後走勢急速逆轉，曾倒插逾10%，股價勁Chok，點解會出現呢個情況？
大華繼顯執行董事梁偉源表示，長飛光纖近期係北水愛股，由於A股波動性較大，股價單日波幅可以超過10%，但近期都好常見。佢指出，集團受惠於人工智能(AI)發展浪潮，所以市場睇好產品增長空間，不過，股價近期升得太急，估值已出現一定泡沫，所以投資者今日趁周末前，大舉獲利回套係正常。
Steven又話，市傳美國禁止內地3大電商喺美國營運數據中心或實驗室嘅消息，都係長飛光纖今日倒插嘅原因，一旦落實相關限制，一定會影響光纖需求，由於長飛光纖逾40%收入來自中國以外地區，投資者一定有戒心，導致股價今朝高開後迅速回調。
