【Now財經台】開源人工智能代理(AI Agent)OpenClaw近期爆紅，內地稱為「龍蝦」，更迅速掀起一股「養龍蝦」熱潮，不過，內地多個部門先後針對呢隻「龍蝦」發風險提示，甚至限制國企及政府機構喺辦公室使用OpenClaw。不過，呢股「龍蝦熱」似乎持續，內地幾大科技巨頭都推出相關應用，包括阿里巴巴(09988)旗下阿里雲手機版JVS Claw、騰訊控股(00700)嘅WorkBuddy、百度集團(09888)嘅DuClaw，邊問內地科企可以喺呢場「龍蝦競賽」中跑出？
勝利證券首席顧問陳建良指，點解中國要禁？OpenClaw同互聯網冇關，只係裝喺自己嘅電腦，但內地生態同外國唔同，好多人屋企冇電腦，好嘢都喺手機裡面，所以就裝喺公司電腦，可能會有潛在安全隱患。
KL又話，內地好多大平台都有自己嘅OpenClaw，即係唔同版本，佢認為，冷卻咗之後，可能會有多啲唔同嘅使用，當產品化之後，估計唔會容許「自己裝自己用」，應該會用雲端方式去使用，會成為一啲雲端產品，雖然今日(13日)大市向下，但之前沽得比較殘嘅科技股，例如阿里及騰訊都「郁下」，所以長遠係應該會受惠，加上依家內地好多Super App，即係一個App就乜都做到，例如微信小程序，呢類平台係會相對受惠。
不過，KL認為，4月中之前都唔可以對市況睇得太樂觀，等情緒完全冷卻後，唔需要急於一窩蜂去「養龍蝦」。
