【信報財經新聞】美伊戰爭未有停火跡象，波斯灣油輪及貨船相繼受襲，伊朗新任最高領袖穆傑塔巴(Mojtaba Khamenei)揚言繼續封鎖霍爾木茲海峽，若戰爭持續將開闢新戰線，刺激油價回升，紐約期油重返每桶90美元之上，令美股周四顯著受壓。其實油價一直高企嘅話，會構成滯脹風險，咁對實體經濟同股市嚟講極為不利，尤其對資金需求龐大，而部分仍然燒緊錢嘅科技企業嚟講，最為不利，所以噚晚納指嘅表現係最差。
道指低開174點後，跌幅最多擴大至755點，低見46662，收市報46667，接近全日低位，跌739點或1.56%；標指曾挫1.56%，收市跌103點或1.52%，報收6672，以科技股為主嘅納指一度插水1.87%，收市跌404點或1.78%，報收22311。俗稱「恐慌指數」嘅VIX波動指數一度抽高12.3%，至27.22。雖然今早亞洲時段，道指及納指期貨有反彈，但至中午反彈升幅已大大收窄，喺油價高企下，反彈動力亦受限。噚日阿Man都講過美股方面，投資組合暫時唔再加貨注，比較着重睇返啲防守位，能夠守住啲支持位已經唔錯。至於NQ今晚個分水嶺下移至24600，下方支持係24500/24400，至於上方阻力喺24800/24900/25000，NQ唔上返25000企穩，反彈一頂低於一頂，都幾濕滯。
至於道指噚晚都插得幾急，主要係大摩同埋Cliffwater限制旗下私募基金贖回，觸發大型銀行及另類資產管理公司大洗太平地，大摩收市插水4.1%，高盛亦跌4.4%，為跌幅最大道指成份股。限制贖回基金其實都幾大件事，主要投資者會擔心係咪相關基金出現流動性不足問題，係會影響市場信心。
美伊戰爭未停，令油價再度回升。內地兩會結束，中央政策取向相對保守，不僅缺乏大規模刺激措施，內地據報限制銀行及國企等使用OpenClaw，拖累科技股維持疲弱，港股昨日低開後反彈乏力，再度受制二萬六關後反覆回落，最終恒生指數跌182點，報收25716，成交額則只有2421億元，反映投資者面對反覆市況，取態較為審慎。及至夜期時段，美股三大指數跌逾1%，夜期及ADR下跌，夜期跌穿25500水平，今早黑期亦於25400水平徘徊，今早恒生指數低開133點，早段一度跌241點，低見25475，差少少先完全回補周二所遺下嘅上升裂口，未補晒即反彈，半日跌幅收窄至123點或0.48%，報25593；國企指數跌1點或0.01%，報8698；科技指數跌20點或0.41%，報5007。半日成交約1260億港元，周末前夕交投更趨淡靜，買賣兩閒。
今早金融股表現特別弱，連一直強勢嘅大笨象(00005)半日都跌咗3.8%，拖累港股連續第三個交易日下跌。不過港股竟然未有乘勢回報周二全個上升裂口25442-25611，期指25351-25535，係多得騰訊(00700)等科技股逆市上升頂住個市。目前紐約期油價仍高企於90美元之上，油價高企不利股市，即使G7早前已表示必要時動用戰略石油儲備，但仍無法遏止油價回升。估計環球股市受美伊戰事影響，短期表現仍反覆，港股亦不例外，今日恒指如借勢回補周二上升裂口後，能否企穩於裂口頂部極為重要，如能重返25700-25750水平，企穩5日及10日線，則回補裂口後有望回穩，甚至完成調整。相反，如回補整個上升裂口之後，連裂口底部即25400亦失守，則再度向下考驗250日線即25000水平機會甚大。暫時港股或先行於25000至26300水平內上落整固，直至下破250日線，或重返20日線企穩，方見再見突破。
麥狄文
(徐狄怡‧證監會持牌人)
