【Now財經台】銀河娛樂(00027)今日(26日)中午出咗業績，去年多賺逾21%，淨收益按年增長13%，經調整撇除利息、稅項、折舊及攤銷前盈利(EBITDA)就升18%，幾條大數都唔算差，但點解股價午後跌幅擴大？
艾德金融執行董事陳政深表示，因為市場之前已預期銀娛業績唔會太差，所以股價喺業績前已偷步炒咗上去，但出到嚟只係符合預期，所以市場唔收貨。佢又話，相對其他賭股，銀娛有溢價，財務狀況亦較健康，又率先受惠於行業復甦，導致股價愈來愈貴。
Ryan續指，銀娛去年EBITDA逾百億元，按年增長50%，相對較溫和，但仔細睇返收入分布，其實只得澳門銀河撐住，喺多項因素加埋之下，市場就認為增長有啲不外如是，亦對VIP業務前景有憂慮，導致股價今日跌咗落去。
