【Now財經台】今日(20日)係港股馬年第一個交易日，可惜未能紅盤高開，恒生指數一度挫逾300點，重磅科技股弱勢，其中，騰訊控股(00700)、阿里巴巴(09988)、百度集團(09888)、網易(09999)及快手(01024)跌至最少1個月低位，不過，地產收租股及國產人工智能(AI)概念股買盤好勁，大股唔得，指數又弱，馬年開局似乎都考起唔少散戶？
冠域商業及經濟研究中心主任關焯照指，恒指支持位暫時喺50天及100天線交匯點，依家市場冇乜特別消息，A股又「放假」，現時外圍擔心美國向伊朗發動軍事行動，加上美股近期回落，恒指都會受外圍情緒影響。佢補充，依家大股冇乜動力，投資者可以觀望下周三(25日)發表嘅《財政預算案》，同埋3月召開嘅「兩會」有冇重磅政策出台，為市場帶嚟新刺激。
關博士又話，雖然港股嘅大型科企都有投資AI，但市場擔心可能會步美國「科技7雄」後塵，擔心資本開支(CapEx)嘅盈利轉化能力，再加上內需疲弱兼有「內捲」問題，短線而言，建議盡量避開呢類股份，轉向一啲容易炒嘅板塊。
