【Now財經台】截至早上11時止，1小時內《彭博》搜尋量最多港股，依次為MINIMAX(稀宇科技)(00100)、騰訊控股(00700)、港鐵公司(00066)、智譜(02513)及紫金礦業(02899)。
人工智能(AI)半新股MINIMAX及智譜股價今日(15日)逆市向下，但都有啲新消息，其中，MINIMAX Agent桌面端有兩項更新，智譜就斥資最多3.6億元收購北京物業，AI Agent功能愈來愈多，亦愈來愈人性化，是好是壞？
資深證券分析師彭偉新指，睇返最新嘅業務發展，MINIMAX Agent可以睇到Mon、操控Mouse做輸入工作，做到最新嘅所謂AI Agent，呢部分可以話係AI發展最終方向，後期配合機械人達至更佳效果，無論美國或內地都希望向呢方面發展，如果可以做好AI Agent，再同其他公司合作開發具AI能力嘅機械人，進程可以跨前一大步，對MINIMAX、智譜都有正面幫助。
股價方面，Castor認為，兩隻股份已升得太高，短時間內衝上1000元水平，令投資者開始有戒心，就算MINIMAX較強勢，但嚟到呢個水平冇必要再高追，不妨等兩隻股份回調到一個合理水位再買貨。
