【Now財經台】截至早上11時止，過去1小時內《彭博》用戶搜尋量最多港股，依次為中國移動(00941)、中國聯通(00762)、比亞迪股份(01211)、康方生物(09926)、新世界發展(00017)。
過去一段時間，北水狂沽中資電訊股，呢個謎底終於揭開，原來內地將會上調電訊服務增值稅(VAT)至9%，摩根士丹利估計，涉及42億至149億人仔，將攤薄今年每股盈利約8%至15%，電訊股盈利增長一向偏低，呢個消息對中移動及聯通係咪最大影響？
富昌證券聯席董事譚朗蔚指，投資者覺得利淡消息落實，靴子落地，股價短線或會見底，以中移動為例，股價今日(2日)急挫後跌幅收窄，但Stevan認為，投資者仍要小心，因為呢個係基本面變化會拖低毛利率，情況就好似之前賭股要向母公司交多咗費用一樣，呢啲利淡消息都需時消化，所以唔好咁快單靠技術層面估底。
Stevan又提醒，電訊股一般都會長揸，博穩健盈利及派息，以中移動為例，股價喺去年12月中開始已轉勢向下，一旦79元都守唔住，真係要再睇定啲先再做部署。
