【Now財經台】委內瑞拉政局動盪，市場擔心會衝擊全球石油供應格局，油價今朝(5日)喺亞洲交易時段一度跌逾1%，「三桶油」都跟跌，其中，中國海洋石油(00883)更下試多條移動平均線，油股走勢轉弱，中海油資金流有冇轉變？產品條款應該點揀？
滙豐亞太區財富管理香港上市產品銷售經理盧貴良指，喺地緣局勢緊張下，油價好大機會因供應受阻而上升，但依家油價不升反跌，令投資者憂慮今次事件或令石油供應不減反增，令油價受壓。受消息影響，中海油今朝一度挫近5%。Daniel指，有部分投資者傾向做長線睇淡部署，條款方面，可以留意行使價約18元，價外13%，實際槓桿約5倍嘅PUT輪。
Daniel補充，中海油係傳統高息股，股息率一直維持約6厘，所以亦有投資者用長身CALL做好倉部署，可以留意行使價25元，價外18%，2026年12月到期，實際槓桿約6倍嘅CALL。
