【Now財經台】截至早上11時止，過去1小時內《彭博》用戶搜尋量最多港股，依次為英矽智能(03696)、泡泡瑪特(09992)、中國海洋石油(00883)、英諾賽科(02577)及美高梅中國(02282)。
「2025年新股尾班車」今朝(30日)開出，6隻新股齊齊掛牌，表現最好暫時係有人工智能(AI)概念嘅藥物開發企業英矽智能(03696)，係咪因為「AI」呢個字令呢隻股份成功跑出？
大華繼顯執行董事梁偉源指，由於市場上同類公司唔多，令唔少資金覺得呢間公司有獨特性，具投資價值。呢隻股今日高開，股價亦企得穩，加上早前英矽智能同日本企業武田製藥有業務合作，亦會吸引到投資者。
Steven建議，如果喺35元水平「冇走到」嘅投資者，可以繼續持有，因為開市獲利回套壓力已經過咗，事實上，集團未來發展的確有好大憧憬空間，冇貨嘅投資者，由於股價喺年尾可能會較波動，加上今年只剩返今日及明日半日市，可以等股價落到30元至31元水平，再考慮買入，高追就唔值得。
