【Now財經台】滙豐控股(00005)上周突然宣布，計劃動用過千億私有化恒生銀行(00011)，滙控管理層強調，私有化係一個審慎嘅商業決定，同恒生嘅不良貸款冇關，呢個重磅消息引起市場熱烈討論，若成功私有化，恒生將會撤銷上市地位，原本揸住恒生收息嘅小股東，可能要搵另一啲收息股代替恒生，應該揀邊隻？
獨立市場策略師何啟聰指，恒生本身都唔係派息最多嘅股份，長遠嚟講，揀股時除咗要睇銀行業績、營運狀況等，亦要留意銀行過去幾年嘅撥備情況，當銀行有大筆款項嘅撥備，就可能會影響日後派息政策，例如大新銀行(02356)同東亞銀行(00023)撥備情況都唔算穩定，雖然中銀香港(02388)撥備增加，但盈利能夠cover到呢筆數，因此，中銀係銀行股之中較好選擇。
