【now.com財經】內地潮玩市場「吸金王」醖釀執位？泡泡瑪特(09992)旗下王牌IP Labubu似乎有失勢跡象，「同門師弟」星星人接棒？
泡泡瑪特「染藍」1個星期，股價累跌約10%，唔少人解讀為中咗「染藍魔咒」，除此之外，集團「最吸金IP」似乎亦出現改朝換代跡象，王牌IP Labubu第4代Mini Labubu二手價喺短間內已後勁不繼，惹嚟「跌落神壇」嘅揣測，呢個時候集團另一個IP星星人，似乎行緊Labubu 3年前嘅「舊路」，盲盒一出就全網瘋搶，一set產品炒高2倍，單隻隱藏版更炒高6倍，反觀Labubu 3.0及Mini Labubu二手價不斷下滑。
星星人由2個90後插畫師聯手創作，角色設計意念係「有黑暗才有星光」，而整個宇宙背景有逾百種唔同性格嘅小星星，每隻星星人都有自己嘅故事，被包裝成「情緒IP」，喺潮玩與心靈慰藉之間搵到新平衡點。
Labubu過去一段時間撐起泡泡瑪特銷售，熱潮席捲全球，一眾大行亦基於呢個原因睇好公司，不過，大約喺1個月前，將泡泡瑪特目標價由340元調高至400元嘅摩根大通，最新狠削目標價25%至300元，兼下調評級，又話一旦公司基本面有少少差池，又或者傳出負面消息，股份有機會跑輸大市，建議等下一輪催化劑出現咗，再評估係咪買入。
不過，摩根士丹利仍不離不棄，目標價仍睇382元，評級「增持」，又話繼續係行業首選。
泡泡瑪特股價今日(15日)大跌，一度重挫近9%，低見252元，其後跌幅收窄。
