【Now財經台】截至早上11時止，1小時內《彭博》用戶關注度上升最多港股，依次為美圖公司(01357)、比亞迪股份(01211)、聯想集團(00992)、地平線機器人(09660)及貝殼(02423)。
同人工智能(AI)相關嘅美圖公司，股價今日(5日)逆市大跌逾10%，但集團早前發咗盈喜，又有阿里巴巴(09988)認購公司可換股債券(CB)，雙方又喺電商平台及AI技術方面有合作，前景應該唔錯，點解今日會跌到咁？
中原資產管理投資策略師劉偉強指，美圖業務不斷延伸，由影相到AI生成，甚至出現AI帶貨，將市盈率(PE)推高至60至70倍，其實正常情況下，公司市值只有約30倍PE，市場見到美圖PE咁高，就會揣測公司業務可能再延伸，未來可能又有新搞作。
Ricky續指，7月中有美圖股東減持，市場可能擔心再有股東減磅，導致股價今日逆市大冧，佢提醒，美圖股價依家剛觸及20天線，如果呢兩日失守，美圖就唔再係一隻強勢股。
