【Now財經台】銀河娛樂(00027)今日(8日)中午派咗成績表，上季淨收益112億元，按年增長6%，經調整EBITDA按年升16%至33億元，股價午後一度高見30.7元，升1.6%，銀娛呢份季績唔錯，依家係咪入市嘅好時機？
耀才證券研究部總監植耀輝指，銀娛呢份業績都收貨，博彩業同經濟表現關聯度高，喺環球經濟唔明朗下，大數仍有好表現，加上有基數效應影響，牌面睇表現係好過去年，所以帶動股價今日向上。
不過，Stanley認為，由於賭股已低殘咗好耐，所以只要有一啲好消息，就會推升股價，呢個情況都好正常，雖然集團勝在現金多，但不斷增加非博彩業務，所以市場對集團信心仍然不足，建議無貨嘅投資者宜再觀望一段時間，之後再作部署。
