【Now財經台】截至早上11時止，1小時內《彭博》用戶搜尋量最多港股，依次為融創中國(01918)、農夫山泉(09633)、港鐵公司(00066)、泡泡瑪特(09992)及長和(00001)。
泡泡瑪特2024年12月底因為產品炒價下跌，股價一度急跌，摩根士丹利認為，炒價下跌唔係因為需求下跌，而係因為「炒家」大量囤貨，官方補貨滿足返市場需求後，令炒家要減價散貨，而大摩係睇好補貨會推升銷售，亦都睇好今年海外收入佔比可以超過一半，因此高估值係合理，亦建議「買入」，股價跌到呢啲位係咪買入機會？
富昌證券聯席董事譚朗蔚指，要集中留意泡泡瑪特海外市佔率及銷售，因為泡泡瑪特最大嘅增長都係來自擴展業務到海外，只係靠內地嘅內需市場就會步其他內需股嘅後塵，外銷係泡泡瑪特最大賣點，但要留意當股價有炒作時，市場又將焦點擺喺產品嘅炒價，而唔係外銷市場。
Stevan 提醒，現時泡泡瑪特股價仍然喺高位，喺90元水平上落，加上現時買賣泡泡瑪特都係以投機為主，如果投資者想入場，一定要先了解市面上炒價行情。如果想穩陣啲，可以等股價回落至85元再留意，止蝕價可以擺78元。
